Urte hasieran, GOR disketxeko arduradunek BERRI TXARRAK-en bilduma lan bat ateratzeko zuten asmoa helarazi ziguten. Helburua? Taldeak zigilu independiente honetan igarotako 10 urteak laburbilduko lituzkeen lan duin bat kaleratzea.

BTX-en ez gara oso atzera begirazale, baina GOR-eko lagunen ideiari baiezkoa ematea deliberatu genuen azkenean, taldearen aro garrantzitsu horren lagin bat kaleratzea, hamarkada hori ohoratzeko modu polita izan daitekeelakoan. Baldintza bakarra jarri genuen: kantuen zerrendan gure zaletuek parte-hartze aktiboa izan zezatela.

Eskakizuna aintzat hartuz, hona hemen “DENAK EZ DU BALIO: SINGLES 1997-2007″ diskoa osatzeko GOR disketxetik BTX-en zaletuoi luzatzen zaizuen gonbitea:

“GOR zigiluan BERRI TXARRAK-en kantarik sonatuenak bilduko dituen lan bat kaleratzeko asmoa daukagu. Disko hau, Berri Txarrak-ek gurean igaro dituen hamar urteotako lagin duina izatea nahi dugu, taldearen oniritziarekin beti ere. Taldeak berak zaleen inplikazioa ezinbestekotzat jo du kantuen aukeraketan eta horregatik jotzen dugu zuengana.

Cdak 20 abesti inguru bilduko ditu, tartean deskatalogatuta edota aurkitzeko zail xamar zegoen bat edo beste. DVD-ak, aldiz, “Zertarako Amestu” dokumentala jasoko du, 2007an argitaratu moduan.

Bilduma lan honen izenburua “DENAK EZ DU BALIO. SINGLES 1997-2007” izango da eta Urrian ikusiko du argia.

Proiektu hau aurrera eraman ahal izateko, hortaz, BTX-en jarraitzaileen laguntza eskatu nahi dugu abestiak aurkeratzeko. Zuen iritziz BERRI TXARRAKen 15 kanturik onenak zeintzuk diren esatea nahi dugu. Abesti hauekin taldearen lehendabiziko urteak duintasunez laburbilduko dituen disko bat osatu nahi dugu. Zerrenda gordiskak@yahoo.es helbidera bidali behar da, izenburuan “BTX kantu zerrenda ” jarriz. Inkesta honen parte hartzaileen artean taldeak sinatutako 10 disko zozketatuko ditugu. Zuen erantzunaren zain egonen gara Abuztuaren 31a arte.

Eskerrik asko eta animatu!

BERRI TXARRAK-en zale batzuek taldearen jarraitzaileen kluba edo BTX Street Team moduan ezagutzen dena jarri dute abian.

Momentuz ekimena Facebook bidez jarraitu daiteke:

http://www.facebook.com/berritxarrakstreetteam

Galder Izagirre izango da aurrerantzean BERRI TXARRAK-en bateria jotzaile berria. DUT edo Kuraia bezalako taldeetan aritua, ibilbide luzeko musikaria da Galder, euskal eszenan ezinbesteko izena.

Honenbestez, BERRI TXARRAK-en ziklo bat itxi eta aro berriari ilusioz ekiteko prest gaude. Zuek ere bertan egotea nahiko genuke, plazer baduzue. Urritik aurrera berrekingo diogu birari eta laster izango ditugu albiste eta kontzertu data gehiago, beraz adi egunotan webguneari. Bitartean, eskerrik asko eta ondo bizi!

Gasteizkoa Aitor Goikoetxearen azken kontzertua izan zen BERRI TXARRAK-ekin. Taldearen sorreratik BTX-en bateria jotzaile izan denak orain gutxi eman zigun ezagutzera bere erabakia, atsekabez baina errespetu osoz onartzen duguna. Etorkizunean zorterik onena opa diogu horrenbestez, eta urteotan guztiotan talde honi emandako guztia eskertuz, besarkadarik beroena bidali nahi diogu lerrootatik.

Hona hemen Aitorren agur-komunikatua:

Kaixo;

Berri Txarrak-en 16 urtez hainbeste bizipen, ilusio eta kilometro elkarrekin bizitu ostean, erronka eta bide berriak jorratzeko momentua iritsi da.

Inoiz ez dut urte hauetan bizitakoa eta sentitutakoa ahaztuko, ezta 1994.urteko uda hartan guzti hau hasteko genituen arrazoiak ere.

Musika, bizitzan arnasa hartzeko behar dudan gauza da niretzat, hala izan da, eta hala izango da etorkizunean ere, eta horregatik, goiz edo berandu bidean topatuko gara.

Urte guzti hauetan, zuei esker Berri Txarrak-en bizi eta sentitu dudan guztiagatik…eskerrik asko. Zuei, hurbil zaudeten horiei bereziki eta urrun egonda ere etxean banengo bezala sentiarazten didazuen beste horiei ere, mila esker.

Ikusi arte, bihotzez…

Aitor BTX.

BERRI TXARRAK-eko Gorka Urbizuk THE RENTALS taldearen proiektu berrian parte hartu du. Matt Sharp (Weezer taldeko kide ohia) buru duen The Rentalsen lan berriak SONGS ABOUT TIME du izena eta proiektu artistiko honen Edizio Mugatu ikusgarrian aurki daiteke kantua.

Luxuzko edizio honek beste hainbat gauzaren artean 4 CD/LP dakartza eta horietako lehenengoan ageri da Gorka, “A Thousand Seasons Past” kantuaren erdarazko bertsioan, Matt Sharpek hala eskatuta. Ahotsen grabaketa Tolosako Bonberenean egin ziren, Karlos Osinaga “Txap”-en gidaritzapean, eta Nerea Urbizuren koroak ere entzun daitezke bertan. Kantu honen euskarazko bertsioa ere grabatua dago, nahiz eta oraingoz ez duen argia ikusi.

“Deluxe Edition” honek, halaber, “Films About Weeks” DVD-a dakar. Bertan, Matt Sharpek filmaturiko 52 laburmetrai biltzen dira eta horietako hirutan Gorka Urbizuren parte hartzea izan da.

Informazio zehatzagoa honako helbidean: www.therentals.com

“Songs About Time” proiektuaren promozio bideoa jarraian:

http://vimeo.com/12248550